Chike Mag Legion Maria

1. Jadolo noriw gi altar, mano e chiege. To chiege mar ringre en mana jatichne, kik othage ngang'.

2. Sanctuary mar Nyasaye ok dagie gi dhako. Kata bura mar auchiel ok kethie ngang', mano en sakrilego. En marach moloyo maricho duto gi duong'.

3. Sanctuary mar Nyasaye ok ji dhawyie kata goruok kanyo, kata yanyruok ok yanyruokie.

4. Sanctuary mar Nyasaye ok donjie gi pala, kata tong', kata bunde.

5. Rang'ol, jajuok, jatung', jakuo, jamiriambo, radhoho, randulme, ralong'no, ng'ama ni gi alama moro e ringre; kik onwang' ordini, doketh dini nyaka non ringre.

6. Jadolo ok ter dhako ma chwore otho, mano richo.

7. Madha ok nyal ter ka chwore otho, mano richo.

8. Jadolo ok nyal mulo pesa mag jokristus nikech onyalo kwalo.

9. Ng'ato momedo dhako kata mon ok nwang' sacrament.

10. Ng'ato mosemiyo nyako ich en ema okendo nyakono ni mar en e chwore mose hange ka pod ng'ato okende.

11. Ng'ato mokendo maonge Maturmonio kik oyud sacrament.

12. Jadolo mochayo jatende moro amora nochunge sacrement nyaka mie chulo.

13. Jodolo nyaka bed gi od puonjruok tich dolo (Simnario). Kaok kamano gibiro somo misa marach.

14. Bishop tichne puonjo Patene kod mothers to gisomonigi pentensia kod Unksio Machien kod yikogi ka gi tho nimar an ema aweyonigi.

15. Bishop ochiwo Konfirmasio edwe mar abich (5) kende, to dwe mar ochiko (9) Bishop oluoro kong'iyo kanise duto morito gi tije kaka osetiyo ei kanisego.

16. Gero udi manie kanise manie dioces en tich Bishop kod Patene kod jodongo mag komiti mag kanisa.

17. Jadolo ok chiem elaro oko, kata nyamo niang' e chiro, kata chamo rabolo moro eyo kowuotho. Kendo ka Jadolo chiemo to musuma liel.

18. Madha ok bed jatich jadolo nimar en minmare.

19. Brother kik kendre kod mother nikech mother ohinge kendo dipo koyanye.

20. Mon ariyo ok riwgo Maturmonio matin en mana jatich maduong'.

21. Jolegion Maria mosore gi lemo kagigoyo chong gi piny to ng'ama duong' ema chiwo hawi.

22. Ng'ama tin miyo ng'ama duong' gimoro ka ogoyo chonge piny, mano e chik marwa.

23. Nyar Jalegion Maria kik ted ni jakafiri kata wuod Jalegion Maria kik kend jakafiri.

24. Jalegion Maria ma omayo ng'ato chiege nochunge e sacrament.

25. Bishop moriwo Padri moro gi chi ng'ato noriembgi kata gi Padrino maok chak negi ei Legion Maria ke eri.

26.
(i) Magi ye gik ma Legion Maria okuongo:
(a) Kong'o. (b) Ndawa. (c) Boo. (d) Obwolo. (e) Akeyo. (f) Mbuta. (g) Omena. (h) Mumi. (i) Kamongo. (j) Diel. (k) Gima otho kende. (l) Nguruwe. (m) Lee modere kod nderma. (n) Apoth. (o) Apwoyo. (p) Aidha. (q) Anier. (r) Oyoyo.
(ii) Kuom Winy, wachamo:
(a) Awendo. (b) Aywer. (c) Gweno.

27. Ot mosenindie kod dhako kik somie misa ma jokristus sudoe.

28. Chiemb Jadolo kikted e laru.

29. Jalegion Maria kik gol nyare kuom chwore ma onge gima omiyo ogole, kogole nochunge e sacrament.

30. Jodolo duto kik gi usie Sacrament mag Nyasaye kod pesa e Legion Maria. Motimo kamano nochunge e tijeno.

31. Jolegion Maria kik donjie e tich siasa. Tijwa en mana lemo kende, to ng'ama dwaro siasa to owe lemo ogo siasa. Manochik.

32. Din marwani okwedo asoya, maka ichamoe asoya, to in Judas mano telo biro tami ni mar ing'iyo koni gikoni ionge kod adira. In adhoga ok inyal pogo wach diere ibiro kethoji.

33. Joma tuo milemonegi kata en nyako kik inind kode, mano Nyasaye odagi ni mano en dwanyruok. Jogo tuochegi ok nyal chango.

34. Kik ikony osiepni kokedo kod jasike ma omon godo, nimar kitho to nidhie mach ma ok tho nikech marach mar osiepnino ema teri e mach.

35. Nyako malemo kik odok malaya ei kanisa to owuondore ni olemo to kara oterore maling' ling' to owuondore ni ok odwar tedo. Riembe uru.

36. Kik mi ng'ato ordini ka onge kama itere ma odhi rito mano en ketho ji. Kendo en ketho Sacrament, mano kik timre.

37. Jalegion Maria ok cham gima tuo, kata gima otho kende, mano Jalegion Maria okwero.

38. Jalegion Maria tichgi en hoyo chuny ji, ok nego gi riembo jomoko e dini, ok pogruok. Dikoro polo osepogore kod ji, kendo kik ukwed ji.

39. Ng'ama wuoyo kod chuny maler kik opimre kod Jadolo kendo Jadolo bende kik donjie tiju. Ng'ama wuoyo kod roho buogo chuny ji nikech obiro hulo timbegi.

40. Brother kik dwanyre kod jatich Jadolo.

41. Jatelo kik kod fitina mag jolupne mano omiyo ji pogore kagimiyo jokristus charuok kod jotendgi, kagiyie kod miriambo, mano tich otamo jatelono, to ber mondo owe telo ni dhano ma Nyasaye ochweyo.

42. Bura mar Jalegion Maria ok ter e kot mar sirikal to mondo gi yal mana giwegi wach marachno ipoge mana ei kanisa.

43. Jalegion Maria kik we Jalegion Maria wadgi ka opodho e tem. Ber mondo gidhi eode gilemne mondo opar lamo Nyasaye.

44. Jalegion Maria kik dhi kar tho kama iywagoe jakafiri mano bende dipoka ochiemo kuro. To ka ochiemo kuro, to ochiemo gi jochiende manie dalano. To mano nyaka tuo goye to kik lemne ni mar okelo tuo owuon e ringre.

45. Jokristus kik girang mana ni oikgi maber to giweyo lemo. Girit Sacrament mag Nyasaye, kendo ung'e ni yik maber ok ter ng'ato ei polo to mana Sacrament emateri ei polo.

46. Kik ulem ni chi jakong'o, ero uhero dhi lemo e ut jokong'o. Chuore ka owuok ka kong'o ka oyudou ei ode, dobetu gi beti. To kautho to mach.

47. Ng'ama podi ok okwong' e tiend musalaba kik somne misa matakatifu, to upenje ka oyie lamo Nyasaye eka kuong'e.

48. Kuoth rach. Kuoth ema kelo charruok. Ka ikuodho Jadolo to nyaka en ema osomni Pentensia. Kisomo kuom Jadolo machielo to mano richoni podi ok ogolni.

49. Ka idhaw ni jatendi to mano ichungori iwuon, noyali eka iyud Pentensia.

50. Ji ariyo mokendore kadhogi ok winjre kata gimonre nikech lemo to mondo ng'at achiel odhi odagie kanisa mondo kwe obed ni gi e dalagino.

51. Jadolo ma odhi pwonjo e piny moro mondo opwonj jo pinyno kod gero kanise, ka otame to ose kia gima ne omine ordini, odogi dalagi.